1837-10-16 - Sasradiningrat kepada Residen Surakarta

Ringkasan: Residen Semarang memberitahu kepada Residen Surakarta, bahwa ada 2 orang Jawa di Sragen bernama Prayadrana dan Setradrana dituduh membeli kerbau curian. Atas kehendak Residen Semarang supaya kedua orang itu ditangkap dan dikirim ke Semarang. Tetapi setelah dicari dan diperiksa di Sragen, kedua orang tersebut tidak ketemu dan menurut keterangan di Sragen memang tidak pernah ada orang-orang yang tersebut di atas.

Atur tabe kula saha kaurmatan akathah-kathah, Kangjêng Radèn Adipati Sasradiningrat. Katur kangjêng tuwan mayor, residhèn ing Surakarta Adiningrat.

Sasampuning kadya punika wiyosipun. Kula sampun anampèni sêrat pêparingipun kangjêng tuwan residhèn. Kang katitimangsan ing Surakarta tanggal kaping 18, wulan Sèptèmbêr, taun 1837, ingkang mungêling sêrat. Kangjêng tuwan residhèn ing Sêmawis angaturi uninga dhumatêng kangjêng tuwan residhèn. Wontên tiyang Jawi kêkalih, sami dhusun ing Sragèn bawah nagari ing Surakarta, tanah Sokawati, awasta Prayadrana, kalih Sêtradrana, punika sami katrêka tumbas maesa colongan. Panêdhanipun kangjêng tuwan residhèn wau, tiyang kêkalih punika mugi kakintuna dhatêng ing Sêmawis. Punika pamundhutipun kangjêng tuwan residhèn. Mugi kula andhawahna parentah anyêpêng têtiyang kêkalih wau, kaladosna dhatêng ing kantor, supados kangjêng tuwan residhèn sagêda angintunakên dhatêng ing Sêmawis.

Ingkang punika atur wangsulan kula ing kangjêng tuwan residhèn, kula sampun anglampahakên utusan [utusa...]

[...n] prayayi panèwu jêksa nagari jêksa pradata lêbêt, Ngabèi Anggod, kalih Ngabèi Krêtimênggala, sakancanipun mantri damêl jawi lêbêt, ingkang sami titipriksa dhatêng siti dhusun Sragen tanah Sokawati, sarêng kapariksa têtiyang ing Sragèn, ingkang nama Sêtradrana, kalih Prayadrana wau sêpên kalih pisan, ing salami-laminipun dhusun ing Sragen punika botên wontên têtiyang ingkang nama Sêtradrana, kalih Prayadrana, ingkang nate tumbas maesa colongan, wondene mênggah aturipun têtiyang siti dhusun ing Sragèn, kalihan aturipun rêdi dhusun bawah ing kadospatèn, kalihan rêdi dhusun bawah kasêpuhan sêdaya, punapa malih aturipun têtiyang siti dhusun kang kalêbêt manca sakawan manca gangsalipun ing Sragèn wau, sampun sami kawrat ing sêrat kula aturakên ing kangjêng tuwan residhèn, asarêng kalihan sêrat kula punika, ingkang mugi kapriksaa ingkang têrang, sumangga panggalihipun kangjêng tuwan residhèn.

Kasêrat ing dintên Sênèn kaping 16, Rêjêp, ing taun Jimawal, ăngka 1765.