1838-02-26 - Sasradiningrat kepada Residen Surakarta

Ringkasan: Keterangan dari lurah pasar, bahwa Demang Plumbon, Ngampel melarang lurah pasar Ngampel menarik pajak pada hari Selasa Kliwon. Setelah diperiksa oleh utusan Sasradiningrat, diperoleh keterangan, bahwa tidak benar jika Demang Plumbon melarang kepada Lurah Ngampel menarik pajak terhadap para pedagang pada hari Selasa Kliwon. Keterangan ini diperbuat juga oleh penduduk setempat.

Atur tabe kula saha kaurmatan akathah-kathah, Kangjêng Radèn Adipati Sasradiningrat. Katur kangjêng tuwan mayor, residhèn ing Surakarta Adiningrat.

Sasampuning kadya punika wiyosipun. Kula sampun anampèni sêrat pêparingipun kangjêng tuwan residhèn. Kang katitimangsan ing Surakarta kaping 12 wulan Pèbêrwari[1] 1838, ingkang mungêling sêrat. Kangjêng tuwan residhèn anampèni atur pratelanipun bandar pêkên utawi wande, yèn dêmang ing Plumbon, bawah ing Ngampèl. Punika mênging dhatêng bandar ing Ngampèl. Gènipun amupu banggi mênawi anglêrêsi ing dintên Gara Kasih.

Punika pamundhutipun kangjêng tuwan residhèn. Mugi kula andhawahna parentah, supados dêmang ing Plumbon wau, sampun ngantos angrêsahi dhatêng bandar wau punika.

Ingkang punika atur wangsulan kula ing kangjêng tuwan residhèn. Kula sampun anglampahakên utusan prayayi panèwu jêgsa nagari jêgsa pradata jawi lêbêt sakancanipun. Atitipariksa dhatêng dêmangipun siti dhusun ing Plumbon bawah ing Ngampèl. Kawêstanan amênging utawi angrêsahi gènipun mupu banggi wande ing Plumbon kalihan wande ing Pêndhawa, sabên ing dintên pêndhak Gara Kasih, mênggah aturipun dêmang ing Plumbon wau, botên rumaos mênging gènipun mupu banggi bandar ing Ngampèl dhatêng wande ing Plumbon kalihan ing Pêndhawa punika, mupakat dhatêng têtiyang parapat mănca gangsalipun siti ing Plumbon sadaya, mênggah aturipun inggih botên wontên ingkang sumêrêp. Yèn dêmang [dê...]

[...mang] ing Plumbon punika amênging utawi angrêsahi pamupunipun banggi bandar ing Ngampèl. Wondene ingkang mupu bangginipun wande kêkalih wau, bandaripun awasta Ni Maliyah, gènipun amaosi dhatêng bandar ing Sêtugur, anama Ki Simban, inggih kabawah bandar ing Ngampèl. Sampun sami kapriksa aturipun inggih botên sumêrêp. Mênawi dêmang ing Plumbon mênging utawi angrêsahi, gènipun mupu banggi wande kêkalih ingkang sampun kasêbut ing ngajêng wau.

Mênggah aturipun dêmang ing Plumbon kalihan têtiyang parapat mănca gangsalipun utawi aturipun bandar wande ing Plumbon punapadene ing Sêtugur wau, sampun sami kawrat ing sêrat sadaya, inggih kula aturakên ing kangjêng tuwan residhèn. Asarêng kalihan sêrat kula punika, mugi kapriksaa ingkang têrang, kula sumăngga panggalihipun kangjêng tuwan residhèn.

Dados botên sayêktos aturipun bandar ing Ngampèl wau.

Kasêrat ing dintên Sênèn kaping 1 wulan Bêsar ing taun Jimawal, ăngka 1765.