1838-09-13 - Sasradiningrat kepada Residen Surakarta

Ringkasan: Di Bawen daerah Salatiga ada pedagang pakaian yang dirampok. Perampoknya tertangkap satu, dalam pemeriksaan mengaku bahwa temannya yang bernama Tirtawijaya, Wiradrana, dan Singadrana, juga ikut merampok. Oleh sebab itu Sasradiningrat, atas perintah residen supaya menangkap ketiga orang tersebut. Akhirnya utusan Sasradiningrat mencari ke Jembangan daerah kekuasaan Ngabei Bandawasa, dan ke Jatinom daerah Boyolali, tempat yang dinyatakan sebagai alamat perampok bertiga, dicari sudah tidak ada, mereka sudah pergi entah kemana.

Atur tabe kula saha kaurmatan akathah-kathah, Kangjêng Radèn Adipati Sasradiningrat. Katur kangjêng tuwan mayor residhèn ing Surakarta Adiningrat.

Sasampuning kadya punika wiyosipun. Kula sampun ani[1] sêrat pêparingipun kangjêng tuwan residhèn. Kang katitimangsan Surakarta kaping 6 wulan Agustus taun 1838, ingkang mungêling sêrat. Kala kaping 15 wulan Juni ingkang sampun kalampahan. Ingkang nyêpêng pak gantosan ing Bawèn bawah Salatiga, dipun kècu ing têtiyang dursila, kèconipun wontên ingkang kacêpêng satunggil. Punika angèmbèt dhatêng têtiyang tiga, anama Tirtawijaya, Wiradrana, Singadrana, sami ing dhusun Jêmbangan bawah Surakarta, punika sami tumut angècu.

Ingkang punika pamundhutipun kangjêng tuwan residhèn. Mugi kula andhawahna parentah, angupadosi sarta anyêpêng tiyang têtiga wau, yèn sampun kacêpêng kaladosêna dhatêng ing kantor, supados kenginga lajêng kakintunakên dhatêng ing Salatiga.

Ingkang punika atur wangsulan kula ing kangjêng tuwan residhèn. Kula sampun anglampahakên utusan, panèwu jêgsa nagari kalihan jêgsa pradata jawi lêbêt. Atitipariksa

dhatêng siti dhusun ing Jêmbangan. Kêkalih, satunggil tanah salèripun ing Ngasêm. Dados rèhipun Ngabèi Băndawasa ing Kartasura, kalih tanah salèripun ing Jatosênèm. Dados rèhing Bayawangsul. Punika sampun sami kapariksa sadaya, mênawi wontên têtiyang têtiga, ingkang sami kaèmbèt ngècu wau, satunggil nama Tirtawijaya, kalih Wiradrana, tiga pun Singadrana, punika mênawi wontên kula dhawahi nyêpêng kaladosêna babêstan. Mênggah aturipun ing bêbêkêl utawi tiyang alit kalih dhusun wau, punapadene aturipun têtiyang ingkang kalêbêt mănca sêkawan mănca gangsalipun sadaya, mênggah tiyang têtiga ingkang sampun mungêl ing inggil wau, sêpên botên wontên ing salamènipun.

Wondene mênggah sêrat papriksanipun siti ing Jêmbangan kêkalih wau, inggih kula aturakên ing kangjêng tuwan residhèn. Mugi kapariksaa ingkang têrang kula sumăngga pagalihing[2] kangjêng tuwan residhèn.

Sinêrat ing dintên Kêmis ping 23 Jumadilakir ing taun Jhe ăngka 1766.