1838-01-29 - Sasradiningrat kepada Residen Surakarta

Ringkasan: Dua teman dari upsinder dan Demang Ngrokok terbunuh di Delanggu, maka hal ini supaya diselidiki dan dicari siapa pembunuhnya, diperintahkan Ngabei Sumadrana untuk melaksanakan tugas. Atas kesepakatan dengan Raden Tumenggung Amongpraja, maka Surajaya dan Jayasemita yang diinapi oleh kedua orang yang terbunuh itu didenda Rp. 50,-

Atur tabe kula saha kaurmatan akathah-kathah, Kangjêng Radèn Adipati Sasradiningrat. Katur kangjêng tuwan mayor, residhèn ing Surakarta Adiningrat.

Sasampuning kadya punika wiyosipun. Kula sampun anampèni sêrat pêparingipun kangjêng tuwan residhèn. Kang katitimangsan Surakarta kaping 18 wulan Dhesèmbêr taun 1837, ingkang mungêling sêrat. Kangjêng tuwan residhèn amaringi sêrat paturanipun upsindêr sarta dêmang ing Ngrokok. Prakawis rencangipun kêkalih ingkang dipun kaniaya pêjah wontên ing Dilanggu kala tanggal kaping 15 wulan Dhesèmbêr ingkang sampun kêlampahan. Pamundhutipun kangjêng tuwan residhèn. Mugi kula andhawahna parentah ingkang sangêt. Amariksani prakawis wau, bilih sampun mugi kula amratelakna ing kangjêng tuwan residhèn.

Ingkang punika atur wangsulan kula ing kangjêng tuwan residhèn. Mênggah sêrat paturanipun upsindêr utawi dêmang ing Ngrokok. Gènipun sami kapêjahan rencang sikêp kêkalih punika, kula lajêng anglampahakên utusan abdi dalêm panèwu jêksa pradata kalihan jêksa nagari jawi lêbêt. Ngabèi Sumadrana sakancanipun. Ingkang sami titipriksa dhatêng dhusun ing Dilanggu, mênggah aturipun têtiyang siti dhusun ing Dilanggu, utawi têtiyang mănca sakawan, mănca gangsalipun ing Dilanggu, sampun sami kawrat ing sêrat sadaya, wontên dene mênggah pangrêmbag kula rèngrèng karampungan. Kaliha[1] kănca kula wadana jêksa, Radèn Tumênggung Amongpraja sakancanipun panèwu jêksa pradata jawi lêbêt. Têtiyang siti dhusun ing Dilanggu, sami kasupaosan sadaya, [sada...]

[...ya,] Dêmang Surajaya ingkang kasipêngan. Kalih Ngabèi Jayasêmita panèwu rêdi ing Dilanggu, sami kapatrapan dhêndha kathahipun 50 rupiyah pêthak.

Ingkang punika mênggah sêrat papriksan dhusun lampahipun panèwu jêksa pradata sakancanipun. Kalih sêrat rèngrèng badhe karampungan. Aturipun Radèn Tumênggung Amongpraja sakancanipun. Utawi yatra dhêndha sèkêt rupiyah pêthak wau sami kula aturakên ing kangjêng tuwan residhèn. Mugi kapariksaa ingkang trêrang, sumăngga panggalihipun kangjêng tuwan residhèn.

Kasêrat Sênèn kaping 3 wulan Dulkangidah, ing taun Jimawal, ăngka 1765.