1837-06-27 - Sasradiningrat kepada Residen Surakarta

Ringkasan: Seseorang bernama Trunayuda serumah dengan mertuanya Nyai Nayawijaya di desa Wringinlarik. Dia dituduh telah membunuh seorang kaum (pemimpin agama) bernama Amad Sapingi. Sasradiningrat atas perintah residen supaya menangkap Trunayuda. Oleh karena itu diperintahlah Ngabei Sumadrana dan Ngabei Anggot untuk mencari dan menangkapnya. Setelah sampai di desa Wringinlarik, yang dicari sudah pergi sejak bulan Besar tahun Ehe yang sudah lewat, jadi tidak ketemu.

Sasampuning kadya punika wiyosipun. Kula sampun anampèni sêrat pêparingipun kangjêng tuwan residhèn. Kang katitimangsan Surakarta kaping 19 wulan Juni taun 1837, ingkang mungêling sêrat kangjêng tuwan residhèn. Amaringi uninga dhatêng ing kula, ing dhusun Wringinlarik wontên tiyang Jawi satunggil. Anama pun Trunayuda, tunggil sagriya kalih marasêpuhipun anama Nyai Nayawijaya, wondening pun Trunayuda wau, katêrka amêjahi kaum dhusun. Anama Amad Sapingi, mênggah pun Trunayuda punika, umumipun sampun asring anglampahi mêkatên. Wartosipun ingkang nama Trunayuda wau, ing sapunika agriya ing dhusun Jati, tumut Tuwan Winêr, biyungipun marasêpuh agriya ing dhusun Wringinlarik.

Ingkang punika pamundhutipun kangjêng tuwan residhèn. Mugi kula andhawahna parentah, anyêpêng pun Trunayuda wau, kainggahakên ing pangadilan kados adat ingkang sampun kalampahan. Bilih sampun rampung prakawisipun kula amratelakna ing kangjêng tuwan residhèn.

Ingkang punika atur wangsulan kula ing kangjêng tuwan residhèn. Kula sampun anglampahakên utusan. Prayayi panèwu jêksa nagari jawi, Ngabèi Sumadrana, kalih prayayi jêksa pradata lêbêt Ngabèi Anggot. Sakancanipun mantri panêkar jawi lêbêt. Titipriksa anyêpêng kabêktaa lumêbêt dhatêng nagari Babêstan. Têtiyang Jawi ingkang nama pun Trunayuda ing Wringinlarik, utawi ing Jati, sarêng dumugi ing dhusun Wringinlarik utawi ing Jati wau, pun Trunayuda sampun kapanggih botên wontên. Sarêng kapariksa aturipun tiyang siti dhusun utawi tiyang mănca sakawan mănca gangsalipun sadaya, gènipun kesah pun Trunayuda wau, kala

ing wulan Bêsar taun Ehe ingkang sampun kalampahan. Wondene mênggah aturipun tiyang siti dhusun ing Wringinlarik ing Jati, sapanunggilanipun tiyang mănca sakawan mănca gangsalipun sadaya, sampun sami kawrat ing sêrat kula aturakên ing kangjêng tuwan residhèn. Sarêng kalihan sêrat kula punika, ingkang mugi kapariksaa ingkang têrang, sumăngga pagalihipun[1] kangjêng tuwan residhèn.

Kasêrat Kêmis kaping 23 wulan Rabingulakir taun Jimawal, ăngka 1765.